Таатай муужралт

 Анх удаа таатай сайхан зунтай учирлаа. Аргагүй л хойд нутаг юм даа. Өдөртөө мэдээж халуун, оройдоо үнэн гоё таатай юмаа. Үл ялиг салхитай, Токио шиг чийгтэй биш, Монгол шиг хуурай биш, яг л миний хүсдэг цаг агаар. 

Энд ирээд удах тусам миний сонголт хичнээн зөв байсныг наанадаж ингээд цаг агаараас эхлээд мэдрүүлээд байх юм даа. Ажил ихтэй байгаа ч дуртай болохоор нээх түүртэхгүй, ичиж зовохгүй асууж тэмдэглэж аваад аз жаргалтайгаар ядарч байна даа. 

Эхний бараг 2 сар гэр ажлаас өөр зам бараг мэдэхгүй, гарч орохдоо хүнтэй хамт яваад замаа тогтоохгүй хүн байлаа. Одоо овоо хүн шиг болсоон, угаасаа утас байхад чадна л даа, зүгээр л бэлэнчлээд хүнд даатгаад л тэр. 

Хааяа нэг өнгөрсөн цагт албаар орхисон хүмүүсээс сураг чимээ гарч ирээд, эргээд л нөгөө хэцүү мэдрэмж үе үе цухалзаад, тэр үед л өөрийгөө болоогүй байна даа гээд сэтгэл гонсойчих гээд бусдаар бол гялалзаж байгаа. 

8 сард ажилласан тасгийхандаа хайртай болсоон. Миний хэмнэлд таарсан хүмүүс, бүгд сүр сархийтэл ажлаа барьж аваад дуусгаад, маазрах үедээ маазраад, хэн нэг нь алдаа гаргахад бүгд гарч ирээд тал талаас нь туслаад, огт зэмлэхгүйгээр алдааг нь ойлгуулаад, харьцаа гэж халуун дулаан. Эхний өдрөөс л хэзээний тэнд байсан мэт, дасах ч хэрэг байгаагүй. Их ч зүйл сурлаа, олон ч юм асуулаа, зөндөө их ажиллалаа. Гараас юм гарах урамтай, үр дүн бараг л шууд харагдаж байгаа болохоор энэ тасагт үлдчих шахлаа. Ирэх 7 хоногоос өөр тасаг дээр ажиллаж эхлэнэ. 

Шинээр танилцсан хүн болгонд хамаг үнэнээ тоочих гэж, тэдний гайхаж байгааг харахаас залхаад тэгсхийгээд амыг нь дагуулдаг болсон. Жинхэнэ наснаасаа овор нэлээд багатай болтой юмаа Пиглет нь. Тэгээд Монголд байгаа гэрийхэн нь харьж ир гэхгүй байна уу гэхээр нь үгүй ээ гэрийхэн Токиод байгаа гэж хариулна. Тэгэхээр аав ээжийх нь аль нэг нь Япон юм уу гэнэ, үгүй ээ гэхээр нэг юм аан гэрлэсэн юм уу гэж асууна тиймээ гэхээр хүүхэд асууна, 2 охинтой, том нь Их сургууль гэхээр багцаагаар нас тооцоод муужирч унацгаагаад үнэн төвөгтэй. За бас нэг хувилбар нь Японд ирээд хэдэн жил болж байна гэж их асууна. Удахгүй 20 жил болно гэхээр бас л савж унаад нас тооцоод сүйд болно. Сүүлийн үед Японд ирээд 10 гаран жил болж байгаа, гэрийхэн ир гэхээ больсоон л гэж хариулдаг болсон. Миний насыг, миний амьдралыг өөр өөрсдийн дураар төсөөлцгөөг дээ гээд хүмүүсийг муужирч унахаас аварч байгаа.